
406༸རྒྱལ་དབང་ཚངས་དབྱངས་རྒྱ་མཚོའི་མགུར་གླུ་བཞུགས་སོ།།
47-6-11
༄༅། །༸རྒྱལ་དབང་ཚངས་དབྱངས་རྒྱ་མཚོའི་མགུར་གླུ་བཞུགས་སོ།།
༄༅། །༸རྒྱལ་དབང་ཚངས་དབྱངས་རྒྱ་མཚོའི་མགུར་གླུ་བཞུགས་སོ། །༡ཤར་ཕྱོགས་རི་བོའི་རྩེ་ནས། །དཀར་གསལ་ཟླ་བ་ཤར་བྱུང་། །མ་སྐྱེས་ཨ་མའི་ཞལ་རས། །ཡིད་ལ་འཁོར་འཁོར་བྱས་བྱུང་། །༢ན་ནིང་བཏབ་པའི་ལྗང་གཞོན། །ད་ལོ་སོག་མའི་ཕོན་ལྕོག །ཕོ་གཞོན་རྒས་པའི་ལུས་པོ། །ལྷོ་གཞུ་ལས་ཀྱང་གྱོང་བ། །༣རང་སེམས་སོང་བའི་མི་དེ། །གཏན་གྱི་འདུན་མར་བྱུང་ན། །རྒྱ་མཚོའི་གཏིང་ནས་ནོར་བུ། །ལོན་པ་དེ་དང་འདྲ་བྱུང་། །
47-6-12
༤འགྲོ་ཞོར་ལམ་བུའི་སྙིང་ཐུབ། །ལུས་དྲི་ཞིམ་པའི་བུ་མོ། །གཡུ་ཆུང་དྲུག་1དཀར་རྙེད་ནས། །བསྐྱུར་བ་དེ་དང་འདྲ་བྱུང་། །༥མི་ཆེན་དཔོན་པོའི་སྲས་མོ། །ཁ་འབྲས་མཚར་ལུགས་བལྟས་ན། །ཁམ་སྡོང་མཐོན་པོའི་རྩེ་ནས། །འབྲས་བུ་སྨིན་དང་2འདྲ་བྱུང་། །༦སེམས་པ་ཕར་ལ་ཤོར་ནས། །མཚན་མོའི་གཉིད་ཐེབས་གཅོག་གི །ཉིན་མོ་ལག་ཏུ་མ་ལོན། །ཡིད་ཐང་ཆད་རོགས་ཡིན་པས། །༧མེ་ཏོག་ནམ་ཟླ་ཡལ་སོང་། །གཡུ་སྦྲང་སེམས་པ་མ་སྐྱོ། །བྱམས་པའི་ལས་འཕྲོ་ཟད་པར། །ང་ནི་སྐྱོ་རྒྱུ་མི་འདུག །1 གྲུ་དཀར། ཞེས་པའང་འདུག2 སྨིན་པ། ཞེས་པའང་འདུག
47-6-13
༨རྩི་ཐོག་བ་མོའི་ཁ་ལ། །སྐྱི་བསེར་རླུང་གི་ཕོ་ཉ། །མེ་ཏོག་སྦྲང་བུ་གཉིས་ཀྱི། །འབྲེལ་མཚམས་གཅོད་མཁན་ལོས་ཡིན། །༩ངང་པ་འདམ་ལ་ཆགས་ནས། །རེ་ཞིག་སྡོད་དགོས་བསམས་ཀྱང་། །མཚོ་མོ་དར་ཁ་འགྲིགས་ནས། །རང་སེམས་ཁོ་ཐག་ཆོད་སོང་། །༡༠གྲུ་ཤན་སེམས་པ་མེད་ཀྱང་། །རྟ་མགོས་ཕྱི་མིག་བལྟས་བྱུང་། །ཁྲེལ་གཞུང་མེད་པའི་བྱམས་པས། །ང་ལ་ཕྱི་མིག་མི་ལྟ། །༡༡ང་དང་ཚོང་འདུས་བུ་མོའི། །ཚིག་གསུམ་དམ་བཅའི་མདུད་པ། །ཁྲ་བོ་སྦྲུལ་ལ་མ་བརྒྱབ། །རང་རང་ས་ལ་གྲོལ་སོང་། །
47-6-14
༡༢ཆུང་འདྲིས་བྱམས་པའི་རླུང་བསྐྱེད། །ལྕང་མའི་ལོགས་ལ་བཙུགས་ཡོད། །ལྕང་སྲུང་ཨ་ཇོ་ཞལ་ངོས། །རྡོ་ཀ་རྒྱག་པ་མ་གནང་། །༡༣བྲིས་པའི་ཡི་གེ་ནག་ཆུང་། །ཆུ་དང་ཐིགས་པས་འཇིག་སོང་། །མ་བྲིས་སེམས་ཀྱི་རི་མོ། །བསུབས་ཀྱང་བསུབ་རྒྱུ་མི་འདུག །༡༤བརྒྱབ་པའི་ནག་ཆུང་ཐེའུས། །གསུང་སྐད་འབྱོན་ནི་མི་ཤེས། །ཁྲེལ་དང་གཞུང་གི་ཐེའུ། །སོ་སོའི་སེམས་ལ་སྐྱོན་དང་། །༡༥སྟོབས་ལྡན་ཧ་ལོའི་མེ་ཏོག །མཆོད་པའི་རྫས་ལ་ཕེབས་ན། །གཡུ་སྦྲང་གཞོན་ནུ་ང་ཡང་། །ལྷ་ཁང་ནང་ལ་ཁྲིད་དང་། །
47-6-15
༡༦སེམས་སོང་བྱམས་པ་3མི་4བཞུགས། །ལྷ་ཆོས་བྱེད་ལ་5ཕེབས་ན། །ཕོ་གཞོན་ང་ཡང་མི་སྡོད། །རི་ཁྲོད་འགྲིམ་ལ་ཐལ་འགྲོ། །༡༧མཚན་ལྡན་བླ་མའི་དྲུང་དུ། །སེམས་ཁྲིད་ཞུ་བར་ཕྱིན་པས། །སེམས་པ་བསྐོར་ཀྱང་མི་ཐུབ། །བྱམས་པའི་ཕྱོགས་ལ་ཤོར་སོང་། །༡༨སྒོམ་པ་བླ་མའི་ཞལ་རས། །ཡིད་ལ་འཆར་རྒྱུ་མི་འདུག །མ་བསྒོམས་བྱམས་པའི་ཞལ་རས། །ཡིད་ལ་ཝ་ལེ་ཝ་ལེ། །༡༩སེམས་པ་འདི་ལ་འགྲོ་འགྲོ། །དམ་པའི་ཆོས་ལ་ཕྱིན་ན། །ཚེ་གཅིག་ལུས་གཅིག་ཉིད་ལ། །3 བུ་མོ། ཞེས་པའང་འདུག4 མ་བཞུགས། ཞེས་པའང་འདུག5 དམ་པའི་ཆོས་ལ། ཞེས་པའང་འདུག
47-6-16
སངས་རྒྱས་འཐོབ་པར་འདུག་གོ །༢༠དག་པ་ཤེལ་རིའི་གངས་ཆུ6། །ཀླུ་བདུད་རྡོ་རྗེའི་ཟིལ་བ། །བདུད་རྩི་སྨན་གྱི་ཕབ་རྒྱུན། །ཆང་མ་ཡེ་ཤེས་མཁའ་འགྲོ། །དམ་ཚིག་གཙང་མས་བཏུང་ན། །ངན་སོང་མྱོང་དགོས་མི་འདུག །༢༡རླུང་རྟ་ཡར་འགྲོའི་དུས་ལ། །རླུང་བསྐྱེད་དར་ལྕོག་བཙུགས་པས7། །མཛངས་མ་མ་བཟང་བུ་མོས། །ང་རང་མགྲོན་པོ་བོས་བྱུང་། །༢༢སོ་དཀར་ལྤགས་པའི་འཛུམ་མདངས། །བཞུགས་གྲལ་སྤྱི་ལ་བསྟན་ཀྱང་8། །མིག་ཟུར་ཁྲ་མོའི་སྒྲིལ་མཚམས། །གཞོན་པའི་གདོང་ལ་བལྟས་བྱུང་། །6 སྒང་ཆུ། ཞེས་པའང་འདུག7 བཙུགས་པ། ཞེས་པའང་འདུག8 བལྟས་བྱུང་། ཞེས་པའང་འདུག
47-6-17
༢༣ཧ་ཅང་སེམས་ལ་སོང་ནས། །འགྲོགས་འདྲིས་ཨེ་ཡོང་དྲིས་པས། །འཆི་བྲལ་བྱེད་ན་མིན་པ། །གསོན་བྲལ་མི་བྱེད་གསུངས་བྱུང་། །༢༤མཛངས་9མའི་ཐུགས་དང་བསྟུན་ན། །ཚེ་འདིའི་ཆོས་སྐལ་ཆད་འགྲོ། །དབེན་པའི་རི་ཁྲོད་འགྲིམས་ན། །བུ་མོའི་ཐུགས་དང་འགལ་འགྲོ། །༢༥ཀོང་ཕྲུག་གཞོན་པའི་བློ་སྣ། །སྦྲང་བུ་རྒྱ་ལ་བཅུག་འདྲ། །ཞག་གསུམ་ཉལ་རོགས་བྱས་པས། །ཕུགས་ཡུལ་ལྷ་ཆོས་དྲན་བྱུང་། །༢༦གཏན་གྲོགས་ཁྱོད་ལ་སེམས་10པའི། །ཁྲེལ་དང་ངོ་ཚ་མེད་ན། །མགོ་ལ་བརྒྱབ་པའི་གཙུག་གཡུས། །སྐད་ཆ་བཤད་11ནི་མི་ཤེས། །9 མཛེས་མའི། ཞེས་པའང་འདུག10 བསམས་པས། ཞེས་པའང་འདུག11 སྨས་དང་། སྨྲ། ཞེས་པའང་འདུག
47-6-18
༢༧འཛུམ་དང་སོ་དཀར་སྟོན་12ཕྱོགས། །གཞོན་པའི་བློ་བྲིད་ཡིན་འགྲོ13། །སྙིང་ན་ཤ་ཚ་ཡོད་མེད། །དབུ་མནའ་བཞེས་རོགས་གནང་དང་། །༢༨སྙིང་ཐུབ་བྱ་རྡོ་ལམ་འཕྲད། །ཨ་མ་ཆང་མས་སྦྱར་བྱུང་། །ལན་ཆགས་བུ་ལོན་བྱུང་ན། །འཚོ་སྐྱོང་ཁྱོད་རས་གནང་ཞུ། །༢༩སྙིང་གཏམ་ཕ་མར་མ་བཤད། །ཆུང་འདྲིས་བྱམས་པར་བཤད་པས། །བྱམས་པ་ཤ་ཕོ་མང་ནས། །གསང་གཏམ་དགྲ་བོས་གོ་སོང་། །༣༠སྙིང་ཐུབ་ཡིད་འཕྲོག་ལྷ་མོ། །རྔོན་པ་ང་རས་ཟིན་ཀྱང་། །དབང་ཆེན་མི་ཡི་དཔོན་པོ། །ནོར་བཟང་རྒྱལ་པོས་འཕྲོག་སོང་། །12 བསྟན་ཆོག ཅེས་པའང་འདུག13 ཡིན་འདུག ཅེས་པའང་འདུག
47-6-19
༣༡ནོར་བུ་རང་ལ་ཡོད་དུས། །ནོར་བུའི་ནོར་ཉམས་མ་ཆོད། །ནོར་བུ་མི་ལ་ཤོར་དུས། །སྙིང་རླུང་སྟོད་ལ་འཚང་བྱུང་། །༣༢རང་ལ་དགའ་བའི་བྱམས་པ། །གཞན་གྱི་འདུན་མར་བླངས་སོང་། །ཁོག་ནད་སེམས་པའི་གཅོང་གིས། །ལུས་པོའི་ཤ་ཡང་བསྐམས་སོང་། །༣༣སྙིང་ཐུབ་རྐུ་ལ་ཤོར་སོང་། །མོ་ཆ་14རྩིས་འབུལ་རན་སོང་། །བུ་མོ་དུང་སེམས་ཅན་མ། །རྨི་ལམ་ལ་ཡང་འཁོར་བྱུང་15། །༣༤བུ་མོར་འཆི་བ་མེད་ན། །ཆང་ལ་འཛད་པ་མི་འདུག །གཞོན་པའི་གཏན་གྱི་16སྐྱབས་གནས། །འདི་ལ་བཅོལ་བས་ལོས་ཆོག །14 མོ་ཕྱྭ། ཞེས་པའང་འདུག15 འཁོར་སོང་། ཞེས་པའང་འདུག16 བསྟན་གྱིས། ཞེས་པའང་འདུག
47-6-20
༣༥བུ་མོ་ཨ་མར་མ་སྐྱེས། །ཁམ་བུའི་ཤིང་ལ་སྐྱེས་སམ། །ཨ་གསར་ཟད་པ་ཁམ་བུའི། །མེ་ཏོག་ལས་ཀྱང་17མགྱོགས་པ། །༣༦བུ་མོ་ཆུང་འདྲིས་བྱམས་པ། །སྤྱང་ཀིའི་རིགས་རྒྱུད་མིན་ནམ། །ཤ་འདྲེས་ལྤགས་འདྲེས་བྱུང་ཡང་། །རི་ལ་ཤོར་གྲབས་18མཛད་གིས། །༣༧རྟ་རྒོད་རི་ཡར་བརྒྱབ་པ19། །རྙི་དང་ཞགས་པས་ཟིན་གྱི20། །བྱམས་པས་ངོ་ལོག་བརྒྱབ་པས། །ཐུགས་21ངོ་ཟིན་པ་མི་འདུག །༣༨བྲག་དང་རླུང་པོ་བསྡེབས་ནས། །རྒོད་པོའི་སྒྲོ་ལ་གཟན་བྱུང་། །17 དེ་ལས། ཞེས་པའང་འདུག18 ཡར་གྲབས། ཞེས་པའང་འདུག19 ཤོར་ཀྱང་། ཞེས་པའང་འདུག20 ཟིན་ཆོག ཅེས་པའང་འདུག21 མཐུ་ངོ་། ཞེས་པའང་འདུག
47-6-21
གཡོ་ཅན་རྫུ་བག་ཅན་གྱིས། །ང་ལ་གཟན་པོ་བྱས་བྱུང་། །༣༩སྤྲིན་པ་ཁ་སེར་གཏིང་ནག །སད་དང་སེར་བའི་གཞི་མ། །བན་དྷེ་སྐྱ་མིན་སེར་མིན། །སངས་རྒྱས་བསྟན་པའི་དགྲ་བོ། །༤༠ས་དེ་ཁ་ཞུར་གཏིང་འཁྱགས། །རྟ་ཕོ་གཏོང་ས་མ་རེད། །གསང་གྲོགས་བྱམས་པའི་ཕྱོགས་སུ། །སྙིང་གཏམ་བཤད་ས་མ་རེད། །༤༡ཚེས་ཆེན་བཅོ་ལྔའི་ཟླ་བ། །ཡིན་པ་22འདྲ་བ་འདུག་སྟེ། །ཟླ་བའི་དཀྱིལ་གྱི་རི་བོང་། །ཚེ་ཟད་ཚང་23ནས་འདུག་གོ །22 ཡིན་ལ་འདྲ་བར། ཞེས་པའང་འདུག23 ཚར་ནས། ཞེས་པའང་འདུག
47-6-22
༤༢ཟླ་བ་འདི་ལ་ཕར་འགྲོ། །རྟིང་མའི་ཟླ་བ་ཚུར་ཡོང་། །བཀྲ་ཤིས་ཟླ་བ་དཀར་པོ། །ཟླ་སྟོད་ཕྱོགས་ལ་མཇལ་ཡོང་། །༤༣དབུས་ཀྱི་རི་རྒྱལ་ལྷུན་པོ། །མི་འགྱུར་བརྟན་པོར་བཞུགས་དང་། །ཉི་མ་ཟླ་བའི་འཁོར་ཕྱོགས། །ནོར་ཡོང་བསམ་པ་མི་འདུག །༤༤ཚེས་གསུམ་ཟླ་བ་དཀར་པོ། །དཀར་གོས་24ནང་ནས་ཆོད་སོང་། །བཅོ་ལྔའི་ནམ་དང་མཉམ་པའི། །ཞལ་བཞེས་གཅིག་ཀྱང་གནང་ཞུ། །༤༥ས་བཅུའི་དབྱིངས་སུ་བཞུགས་པའི། །དམ་ཅན་རྡོ་རྗེ་ཆོས་སྐྱོང་། །མཐུ་དང་ནུས་པ་ཡོད་ན། །བསྟན་པའི་དགྲ་བོ་སྒྲོལ་25དང་། །24 དཀར་དགོས། ཞེས་པའང་འདུག25 སྐྲོད། ཅེས་པའང་འདུག
47-6-23
༤༦ཁུ་བྱུག་མོན་ནས་ཡོང་བས། །ནམ་ཟླའི་ས་བཅུད་འཕེལ་སོང་། །ང་དང་བྱམས་པ་འཕྲད་ནས། །ལུས་སེམས་ལྷོད་པོར་ལངས་སོང་། །༤༧ཁྱི་དེ་སྟག་ཁྱི་གཟིག་ཁྱི། །གདག་ག་བྱིན་26ནས་འདྲིས་སོང་། །ནང་གི་སྟག་མོ་རིས་འཛོམས། །འདྲིས་ནས་ཐུ་རུ་ལངས་སོང་། །༤༨ཤ་འཇམ་ལུས་པོ་འབྲེལ་27ཀྱང་། །བྱམས་པའི་གདེང་ཚོད་མི་ལོན། །ས་ལ་རི་མོ་བྲིས་པས། །ནམ་མཁའི་སྐར་ཚོད་ཐིག་བྱུང་། །༤༩ང་དང་བྱམས་པའི་སྡེབ་ས། །ལྷོ་རོང་མོན་པའི་ནགས་གསེབ། །སྨྲ་མཁན་ནེ་ཙོ་མ་གཏོགས། །སུ་དང་གང་གིས་མི་ཤེས། །26 བསྟེར་ནས། ཞེས་པའང་འདུག27 འདྲེས་དང་། འདྲིས། ཞེས་པའང་འདུག
47-6-24
སྨྲ་མཁན་ནེ་ཙོ་ཨོ་ཤེས། །གསང་ཁ་མདོ་28ལ་མ་གནང་། །༥༠ལྷ་ས་མི་ཚོགས་མཐུག་ལ། །འཕྱོངས་རྒྱས་མི་སྤུས་དག་པ། །ང་ལ་ཡོད་པའི་ཆུང་འདྲིས། །འཕྱོངས་རྒྱས་གཞུང་ལ་ཡོད་དོ། །༥༡ཁྱི་རྒན་རྒྱ་བོ་29ཟེར་བ། །རྣམ་ཤེས་མི་ལས་སྤྱང་བ། །སྲོད་ལ་ཕྱིན་སོང་མ་ཟེར། །ཐོ་རངས་ལོག་བྱུང་མ་ཟེར། །༥༢སྲོད་ལ་བྱམས་པ་བཙལ་བས། །ཐོ་རངས་ཁ་བ་བབས་བྱུང་། །གསང་དང་མ་གསང་མི་འདུག །ཞབས་རྗེས་གངས་ལ་བཞག་འདུག30།28 སྟོན་པ། ཞེས་པའང་འདུག29 རྒྱའུ། ཞེས་པའང་འདུག30 བཞག་སོང་། ཞེས་པའང་འདུག
47-6-25
༥༣པོ་ཏ་ལ་རུ་བཞུགས་དུས། །རིག་འཛིན་ཚངས་དབྱངས་རྒྱ་མཚོ། །ལྷ་ས་ཞོལ་དུ་སྡོད་དུས། །འཆལ་པོ་དང་བཟང་དབང་པོ། །༥༤ཤ་འཇམ་ཉལ་31སའི་ནང་གི །སྙིང་ཐུབ་དུང་སེམས་ཅན་མ32། །ཨོ་ལོའི་རྒྱུ་ནོར་འཕྲོག་པའི། །གཡོ་སྒྱུ་བཤད་པ་མིན་འགྲོ། །༥༥དབུ་ཞྭ་དབུ་ལ་བཞེས་སོང་། །དབུ་ལྕང་རྒྱབ་ལ་དབྱུགས་སོང་། །ག་ལེ་ཕེབས་དང་33བྱས་པས། །ག་ལེ་བཞུགས་ཤིག་34གསུངས་བྱུང་35། །ཐུགས་སེམས་སྐྱོ་ཡོང་36བྱས་པས། །མགྱོགས་པོ་འཕྲད་ཡོང་གསུངས་བྱུང་། །31 མལ་སའི། ཞེས་པའང་འདུག32 ཅན་མས། ཞེས་པའང་འདུག33 ཕེབས་ཟེར། ཞེས་པའང་འདུག34 ཞུགས་ཞེས་དང་། བཞུགས་བྱེད། ཅེས་པའང་འདུག35 ཟེར་གིས། ཞེས་པའང་འདུག36 སྐྱོ་བྱུང་། ཞེས་པའང་འདུག
47-6-26
༥༦བྱ་དེ་ཁྲུང་ཁྲུང་དཀར་པོ། །གཤོག་རྩལ་ང་ལ་གཡོར་དང་། །ཐག་རིང་རྒྱང་ལ་མི་འགྲོ། །ལི་ཐང་བསྐོར་ནས་སླེབ་ཡོང་། །༥༧ཤི་དེ་དམྱལ་བའི་ཡུལ་གྱི། །ཆོས་རྒྱལ་ལས་ཀྱི་མེ་ལོང་། །འདི་ནས་ཁྲིག་ཁྲིག་མི་འདུག །འདི་ནས་ཁྲིག་ཁྲིག་གནང་ཞུ། །༥༨མདའ་མོ་འབེན་ལ་ཕོག་སོང་། །མདེའུ་ས་ལ་འཛུལ་སོང་། །ཆུང་འདྲིས་བྱམས་པ་འཕྲད་བྱུང་། །སེམས་ཉིད་རྗེས་ལ་འབྲངས་སོང་། །༥༩རྒྱ་གར་ཤར་གྱི་རྨ་བྱ། །ཀོང་ཡུལ་མཐིལ་གྱི་ནེ་ཙོ། །འཁྲུངས་ས་འཁྲུངས་ཡུལ་མི་གཅིག །འཛོམས་ས་ཆོས་འཁོར་ལྷ་ས། །
47-6-27
༦༠མི་ཚོས་ང་ལ་ལབ་པ། །དགོངས་དག་ཡིན་པ་ཁག་ཐེག །ཨོ་ལོའི་གོམ་གསུམ་ཕྲ་མོ། །གནས་མོའི་ནང་ལ་ཐལ་སོང་། །༦༡ལྕང་མ་བྱེའུར་སེམས་ཤོར། །བྱེའུ་ལྕང་མར་སེམས་ཤོར། །སེམས་ཤོར་མཐུན་པ་བྱུང་ན། །བྱ་ཁྲ་ཧོར་པས་མི་ཐུབ། །༦༢ད་ལྟའི་ཚེ་ཐུང་འདི་ལ། །དེ་ཁ་ཙམ་ཞིག་ཞུས་ནས། །རྟིང་མ་བྱིས་པའི་ལོ་ལ། །མཇལ་འཛོམ་ཨེ་ཡོང་བལྟའོ། །༦༣བྱ་དེ་སྨྲ་མཁན་ནེ་ཙོ། །ཁ་རོག་བཞུགས་རོགས་མཛོད་དང་། །ལྕང་གླིང་ཨ་ལྕེ་འཇོལ་མོ། །གསུང་སྙན་སྒྱུར་དགོས་བྱུང་སོང་37། །37 བྱས་བྱུང་། ཞེས་པའང་འདུག
47-6-28
༦༤རྒྱབ་ཀྱི་ཀླུ་བདུད་བཙན་པོ། །འཇིགས་དང་མི་འཇིགས་མི་འདུག །མདུན་གྱི་ཀ་ར་ཀུ་ཤུ། །འཐོགས་སུ་དགོས་པ་བྱས་སོང་། །༦༥དང་པོ་མ་མཐོང་ཆོག་ཀ །སེམས་པ་ཤོར་དོན་མི་འདུག །གཉིས་པ་མ་འདྲིས་ཆོག་ཀ །སེམས་གཅོང་ཞུགས་38དོན་མི་འདུག39།༼འདི་ཡན། [རིག་འཛིན་ཚངས་དབྱངས་རྒྱ་མཚོའི་གསུང་མགུར་དང་གསང་བའི་རྣམ་ཐར་] [གངས་ལྗོངས་མཁས་དབང་རིམ་བྱོན་གྱི་རྩོམ་ཡིག་གསེར་གྱི་སྦྲམ་བུ་] དང་། [ཚངས་དབྱངས་རྒྱ་མཚོའི་མགུར་གླུ།][གངས་ཅན་བོད་ཀྱི་ཉེ་རབས་ཕུལ་བྱུང་རྩོམ་ཡིག་གཅེས་བསྡུས།]བཅས་ཕྱག་དེབ་བཞི་པོ་རྣམས་གཅིག་མཐུན་འཁོད་པ་ལྟར་བཀོད་ཡོད།༽གཤམ་གསལ་ཤོ་ལོ་ཀ་བརྒྱད་པོ་རྣམས་མཚོ་སྔོན་མི་རིགས་དཔེ་སྐྲུན་ཁང་ནས་བསྐྲུན་པའི་[ཚངས་དབྱངས་རྒྱ་མཚོའི་མགུར་གླུ།] ནང་བོད་ཀྱི་གླུ་གཞས་ཅེས་པའི་ནང་ནས་ཤོ་ལོ་ཀ་བརྒྱད་བཤུས་ནས་མཇུག་མཐར་ཁ་སྣོན་དུ་བཀོད་པ་རྣམས་ཡིན།38 ཡོང་དོན། ཞེས་པའང་འདུག39 ཤིང་པར་དུ། སེམས་ཆགས་ལུས་དོན་མི་འདུག །ཅེས་པའང་འདུག
47-6-29
༦༦རིག་འཛིན་ཚངས་དབྱངས་རྒྱ་མཚོ། །སྙིང་སྡུག་འཚོལ་གྱིས་མ་གསུང་། །རང་ལ་དགོས་པ་ནང་བཞིན། །མི་ལ་དགོས་ཀྱི་ཡོད་འགྲོ། །༦༧ལྷ་ཤིང་ཤུག་པའི་རྩེ་ལ། །ཁུ་བྱུག་གཞོན་ནུ་བབས་འདུག །གསུང་སྐད་མང་པོ་མི་དགོས། །སྙན་པོ་ཚིག་གཅིག་གསུངས་དང་། །༦༨བསམ་ཡས་བྱ་ཕོ་དཀར་པོ། །བྱ་སྐད་སྔ་པོ་མ་རྒྱོབ། །ང་དང་ཆུང་འདྲིས་བྱམས་པ། །སྙིང་གཏམ་ཤོད་འཕྲོ་ལུས་ཡོད། །༦༩ཆང་འདི་དང་པོས་མ་བཟི། །ཆང་འདི་གཉིས་པས་མ་བཟི། །ཆུང་འདྲིས་བྱམས་པས་ཞུས་པས། །ཞལ་དཀར་གང་གིས་བཟི་སོང་། །
47-6-30
༧༠མི་ཚོ་མང་པོའི་དཀྱིལ་དུ། །ང་གཉིས་ཡིན་མདོག་མ་གནང་། །ཁྱེད་ཀྱི་ཐུགས་ལ་ཡོད་ན། །སྤྱན་གྱིས་གཟིགས་ཕྱོགས་གནང་དང་། །༧༡ཁྱོད་ནི་གསེར་ཟངས་སྐུ་རེད། །ང་ནི་འདག་པའི་ལྷ་རེད། །ལྷ་ཁང་གཅིག་གི་ནང་དུ། །ང་གཉིས་མཉམ་དུ་མི་ཡོང་། །༧༢སེམས་གཅོང་བྱམས་པས་གཅུག་པའི། །ལུས་པོའི་མདོག་ལ་གཟིགས་དང་། །ཤ་སྐམ་པགས་སྐམ་བྱས་པར། །ཨེམ་རྗེ་བརྒྱ་ཡིས་མི་ཕན། །༧༣ཤ་ཚ་ཆེ་བའི་དུས་ལ། །སྙིང་གཏམ་ཚང་མ་མ་ཤོད། །ཁ་གཅིག་སྐོམ་པའི་དུས་ལ། །རྫིང་ཆུ་ཚང་མ་མ་འཐུང་། །
47-6-31
ལས་ལ་འགྱུར་བ་ཡོང་དུས། །འགྱོད་པ་བྱས་ཀྱང་འཕྱིས་སོང་། །༼ཟུར་བཀོད། གཤམ་གྱི་ཤོ་ལོ་ཀ་འདི་ཉིད་མཚོ་སྔོན་མི་རིགས་དཔེ་སྐྲུན་ཁང་ནས་བསྐྲུན་པའི་[ཚངས་དབྱངས་རྒྱ་མཚོའི་མགུར་གླུ།] ཤོ་ལོ་ཀ་ཨང་༤༧ པར་འཁོད་པ་འདི་བཞིན་ཚིག་ལ་མང་ཉུང་དང་། དོན་ལ་ཆད་ལྷག་ཆེ་བས་ཟུར་དུ་དབྱུང་བ་ཡིན།༽༧༤མི་རྟག་འཆི་བ་སྙིང་ནས་མ་དྲན་ན། །སྤྱང་གྲུང་འཛོམས་ཀྱང་།དོན་ལ་ལྐུག་པ་འདྲ་བྱུང་། །
47-6-32
༼གཤམ་གསལ་ཤོ་ལོ་ཀ་ཨང་། ༦༦ ནས་༡༢༤ བར་དཔེ་དེབ་གཞན་དུ་མི་གསལ་ཞིང་། རིག་འཛིན་ཚངས་དབྱངས་རྒྱ་མཚོའི་གསུང་མགུར་དང་གསང་བའི་རྣམ་ཐར་ནང་གསལ་ཚངས་དབྱངས་རྒྱ་མཚོའི་མགུར་གླུ་བྲིས་མ་ཤོ་ལོ་ཀ་གྲངས་༣༦༠ ལས་ཤོ་ལོ་ཀ་༡༢༤ བདམས་ཏེ་བཀོད་པ་ལས་བཏུས་ཤིང་།ཤོ་ལོ་ཀའི་གོ་རིམ་གྱི་ཨང་གྲངས་རང་སོར་བཞག་ཡོད།༽༦༦ཚིག་གསུམ་སྙིང་གཏམ་ཤོད་ས། །ནེའུ་གསིང་ལྕང་རའི་སྦུག་སྐྱོག །བྱེའུ་འཇོལ་མོ་མ་གཏོགས། །སུ་དང་གང་གིས་མི་ཤེས། །༦༧མེ་ཏོག་བཞད་ནས་ཡལ་སོང་། །བྱམས་པ་འགྲོགས་ནས་རྒས་སོང་། །ང་དང་སེར་ཆུང་བུང་བའི། །བློ་ཐག་དེ་ཁས་ཆོད་སོང་། །༦༨མེ་ཏོག་ཡལ་བའི་འདབ་མ། །ཨ་གསར་ཟད་པའི་སྙིང་སྡུག །འཛུམ་མདངས་སོ་དཀར་བསྟན་ཀྱང་། །སེམས་ལ་དགའ་ཚོར་མི་འདུག །
47-6-33
༦༩བྱམས་པ་མཚར་བའི་སྒང་ལ། །ཕར་ཚུར་བརྩེ་དུང་ཆེ་ནས། །ད་ལམ་རི་ཁྲོད་འགྲིམ་པའི། །འགྱངས་ཆ་ཞུ་དགོས་བྱུང་ངོ་། །༧༠རྟ་ཕོ་རྒྱུག་པ་སྔ་སོང་། །སྲབ་མདའ་འཐེན་པ་ཕྱིས་སོང་། །ལས་འཕྲོ་མེད་པའི་བྱམས་པ། །སྙིང་གཏམ་ཤོད་པ་སྔ་སོང་། །༧༡ལ་དེ་རྒོད་དཀར་ལ་མོ། །འཛེག་ཀྱིན་འཛེག་ཀྱིན་ཕྱིན་པས། །གངས་རི་ཞུ་བའི་ཆུ་སྣ། །དང་ལའི་རྐེད་དུ་མཇལ་བྱུང་། །༧༢ཤིང་དེ་བརྒྱ་ཡི་དཀྱིལ་ནས། །རྒྱལ་ལྕང་སྡོང་པོ་འདེམས་པས། །རྒྱལ་ལྕང་ཁོག་པ་རུལ་བ། །ཨོ་ལོས་ད་བར་མ་ཤེས། །
47-6-34
༧༣ཆུ་མོ་ག་ལེ་ག་ལེ། །ཉ་མོའི་བློ་སྣ་སྲིང་དང་། །ཉ་མོའི་བློ་སྣ་བསྲིང་ན། །ལུས་སེམས་བདེ་ལ་འཁོད་སོང་། །༧༤ལྕང་གླིང་གྲུ་བཞིའི་ནང་གི །འཇོལ་མོ་སྐྱིད་སྐྱིད་བུ་ཁྲིད། །ཧ་ཅང་གནག་རང་དྲགས་ནས། །དགའ་བའི་དུང་སེམས་ཡལ་སོང་། །༧༥ཕུ་ཡི་སྤང་མདོག་འགྱུར་སོང་། །མདའ་ནས་ཤིང་ལོ་སྐྱུར་སོང་། །ཁུ་བྱུག་མོན་ལ་འགྲོ་བའི། །ཁུག་རྟ་ཡིན་ན་དགའ་བ། །༧༦ཁུ་བྱུག་མོན་ནས་ཡོང་བ། །ལྷ་ཤིང་བསམ་ནས་ཡོང་ཡོད། །ལྷ་ཤིང་འགྱུར་མདོག་སྟོན་ནས། །ཁུ་བྱུག་མོན་ལ་ལོག་འགྲོ། །
47-6-35
༧༧ཀོང་ཡུལ་ཕྱོགས་ནས་ཕེབས་པའི། །བྱ་དེ་སྨྲ་མཁན་ནེ་ཙོ། །ང་ཡི་ཆུང་འགྲོགས་མཛེས་མ། །སྐུ་ཁམས་བཟང་པོ་ཨེ་འདུག །༧༨ཁྲ་ཆུང་མིག་གི་འོག་ནས། །སྦྲང་ཆར་སིལ་མ་བབས་བྱུང་། །གཏན་གྲོགས་ཁྱེད་ཀྱི་ཁྲེལ་དང་། །ངོ་ཚ་ང་ལ་གཟིགས་དང་། །༧༩ཕར་ལ་ཕེབས་པའི་དུས་སུ། །ཁྲ་ཆུང་མིག་གིས་བསྐྱལ་ཡོད། །ནམ་ཞག་གཏན་དུ་ངོ་འཛུམ། །སོ་དཀར་སེམས་བཟང་ཞུས་ཡོད། །༨༠བྱ་དེ་ཁུ་བྱུག་སྔོན་མོ། །མོན་ལ་ག་ཙམ་ཐད་ཡོང་། །ང་ཡི་སྙིང་གྲོགས་མཛེས་མར། །འཕྲིན་པ་ལན་གསུམ་བསྐུར་དགོས། །
47-6-36
༨༡གཡུ་ཐོག་ལྕང་གླིང་གྲུ་བཞིའི། །འཇོལ་མོ་སྐྱིད་སྐྱིད་བུ་ཁྲིད། །ནེ་ཙོ་ང་དང་བསྡོངས་ནས། །ཀོང་ཡུལ་ཤར་ལ་ཨེ་ཐད། །༨༢ཤར་ཕྱོགས་ཀོང་པོ་བར་ལ། །མཐོ་དང་མི་མཐོ་མི་འདུག །བྱམས་པ་ཡིད་ལ་ཡོད་པ། །རྟ་ཕོ་འགྲོ་འགྲོ་གཏོང་གི །༨༣འཕྱོངས་རྒྱས་ལྕང་གླིང་གྲུ་བཞི། །འཇོལ་མོ་བསོད་ནམས་དཔལ་འཛོམ། །ཐག་རིང་རྒྱང་ལ་མི་འགྲོ། །མཇལ་འཛོམས་ལས་ཀྱིས་ལོས་ཡོང་།།༨༤ད་ལོ་བཏབ་པའི་ལོ་ཏོག །སང་ཕོད་མ་སྨིན་ཟེར་ན། །གནམ་གྱི་སྦྲང་ཆར་སིལ་མ། །ཐུགས་བསམ་བཞེས་རོགས་གནང་ཞུ། །
47-6-37
༨༥དམན་ཤར་སྐྱེ་འབྲས་མཚར་ལ། །ཇ་ཆང་འདོད་ཡོན་འཛོམས་པ། །ཤི་ནས་ལྷ་ལུས་བླངས་ཀྱང་། །འདི་ལས་དགའ་ངེས་མི་འདུག །༨༦ཆགས་སྡང་སེར་སྣ་བསགས་པའི། །འདོད་ཡོན་སྒྱུ་མའི་ནོར་རྫས། །ཆུང་འདྲིས་བྱམས་པ་བྱུང་དུས། །སེར་སྣའི་མདུད་པ་གྲོལ་སོང་། །༨༧མ་བྱས་མི་ཁ་སྡང་བ། །ང་དང་ཕོ་རོག་ནག་ཆུང་། །བྱས་ཀྱང་མི་ཁ་མི་འདུག །ཁོང་དང་རྒྱ་ཁྲ་ཧོར་པ། །༨༨ཆུ་མོ་གཏིང་ཚད་རིང་ཡང་། །ཉ་མོས་ལྕགས་ཀྱུས་ལོན་གིས། །སྙིང་སྡུག་ཁ་དཀར་གཏིང་ནག །ཁོག་པ་ད་དུང་མ་ལོན། །
47-6-38
༨༩དཀར་ནག་ལས་ཀྱི་ས་བོན། །ད་ལྟ་ལྐོག་ཏུ་བཏབ་ཀྱང་། །འབྲས་བུ་སྦས་པས་མི་ཐུབ། །རང་རང་སོ་སོར་སྨིན་འདུག40།༩༠དྭགས་ཡུལ་ས་ནམ་དྲོ་ལ། །དྭགས་མོ་རྣམ་པ་ལེགས་པ། །མི་རྟག་འཆི་བ་མེད་ན། །ཚེ་གང་བསྡད་ཀྱང་བསྡད་ཆོག །༩༡རླུང་པོ་གང་ནས་ལང་ལང་། །ཕ་ཡུལ་ཕྱོགས་ནས་ལང་བྱུང་། །ཆུང་འདྲིས་བྱམས་པའི་ལུས་པོ། །མ་ནོར་རླུང་པོས་འཁྱེར་བྱུང་། །༩༢ནུབ་ཕྱོགས་རི་བོའི་རྩེ་ནས། །སྤྲིན་དཀར་གནམ་ལ་ལོང་ལོང་། །ང་ལ་ཡིད་འཛིན་དབང་མོས། །ལྷ་བསང་བཏང་བ་ལོས་ཡིན། །40 སྨིན་གི །ཞེས་པའང་འདུག
47-6-39
༩༣ཆུ་དང་འོ་མ་འདྲེས་པ། །འབྱེད་མཁན་གསེར་གྱི་རུས་སྦལ། །སྙིང་སྡུག་ཤ་སེམས་འདྲེས་པ། །དབྱེ་མཁན་སུ་ཡང་མི་འདུག །༩༤རང་སེམས་ཁ་བཏགས་དཀར་པོ། །ནག་ནོག་མེད་པ་ཞུས་ཡོད། །མི་སེམས་སྣག་ཚའི་རི་མོ། །འབྲི་འདོད་ཡོད་ན་བྲིས་ཤོག །༩༥ཕར་སེམས་བྱམས་དང་སྙིང་རྗེ། །སྤྲིན་ཕུང་གསར་དུ་འཁྲིགས་བྱུང་། །ཚུར་སེམས་སྡུག་པོའི་རླུང་པོས། །ཡང་ནས་ཡང་དུ་གཏོར་བྱུང་། །༩༦སྦྲང་བུ་སྐྱེ་བ་སྔ་སོང་། །མེ་ཏོག་ཤར་བ་ཕྱིས་སོང་། །ལས་འཕྲོ་མེད་པའི་སྙིང་སྡུག །མཇལ་འཛོམ་བྱེད་པ་འགྱངས་སོང་། །
47-6-40
༩༧ངུར་སྨུག་མདོག་གིས་བསྒྱུར་བའི། །བླ་མ་ཡོང་རྒྱུ་ཡིན་ན། །མཚོ་སྟོད་གསེར་བྱ་ངང་པས། །འགྲོ་བ་འདྲེན་པ་འདུག་གོ །༩༨གཞན་ཟེར་ཚིག་ཟློས་ཁྱེར་བས། །བསླབ་གསུམ་བསྟན་པ་འཛིན་ན། །འདབ་ཆགས་ཨ་བོ་ནེ་ཙོས། །ཆོས་འཁོར་བསྐོར་བ་འདུག་གོ །༩༩ཆུ་མོ་ཆེ་བའི་སེམས་ནད། །གྲུ་ཤན་གཉན་པས་སེལ་སོང་། །སྙིང་སྡུག་ཤི་བའི་མྱ་ངན། །སུ་ཡིས་སེལ་རོགས་བྱེད་པ། །༡༠༠གཏམ་གསུམ་མི་ཁ་ངན་པས། །ས་སྟེང་ཀུན་ལ་ཁྱབ་སོང་། །རང་ལ་དགའ་བའི་སྙིང་སྡུག །མིག་གི་བར་ལ་ལོང་ལོང་། །
47-6-41
༡༠༡སེམས་པ་དཀར་བའི་ཕྱོགས་སུ། །རྟ་ལས་བོང་བུ་མགྱོགས་པ། །ལྟ་ལ་སྒ་ཆ་རྒྱབ་དུས། །བོང་བུ་ལ་མོ་ཐེབ་41སོང་། །༡༠༢པད་སྦྲང་སེར་པོའི་ཐུགས་ལ། །ག་འདྲ་ཡོད་ནི་མི་ཤེས། །ལོ་ཡག་ལྗང་པའི་ཐུགས་ལ། །སྦྲང་ཆར་སིལ་མ་འདོད་གི །༡༠༣ཕ་ཡུལ་ས་ཐག་རིང་ནས། །དྲིན་ཅན་ཕ་མ་མི་འདུག །མེད་ཀྱང་སྡུག་རྒྱུ་མི་འདུག །མ་ལས་ལྷག་པ་ཡོད་དོ། །མ་ལས་ལྷག་པའི་བྱམས་པ། །ལོ་མོ་རྒྱབ་ནས་42ཡོད་དོ། །41 བརྒལ་སོང་། ཞེས་པའང་འདུག42 རྒྱབ་ན། ཞེས་པའང་འདུག
47-6-42
༡༠༤ཁམ་སྡོང་འདོམ་པ་གང་ལ། །མེ་ཏོག་ཁྲ་ཆིལ་དགུ་ཆིལ། །འབྲས་བུ་དུས་སུ་སྨིན་པའི། །ཞལ་བཞེས་གནང་རོགས་གནང་ཞུ། །༡༠༥ཟུར་མིག་གཞུ་དང་ལྡན་པའི། །ཐུགས་སེམས་ཉག་ཕྲན་མདའ་མོ། །གཞོན་པའི་སྙིང་གི་སྤང་སྟོད། །མཐོན་པོའི་དཀྱིལ་ལ་ཟུག་བྱུང་། །༡༠༦རི་དེ་གཡས་རིའི་ལོགས་ལ། །སུག་པ་གྲངས་མེད་བཀོག་ཡོད། །ང་དང་མ་སྐྱེས་ཨ་མའི། །མི་ཁ་ཁྲུས་ཡས་བྱས་ཆོག །༡༠༧ང་དང་མ་སྐྱེས་ཨ་མའི། །གཉེན་སྒྲིག་ལྷ་བསང་གཏོང་རྒྱུར། །རི་དེ་གཡོན་རིའི་ལོགས་ནས། །སྤ་ཤུག་འདྲེས་མ་གཏོག་ཡོད། །
47-6-43
༡༠༨ལྕང་མ་བཅག་ནི་མ་བཅག །འཇོལ་མོ་དཀྲོག་ནི་མ་དཀྲོག །རྫོང་རྒྱབ་ཀླུ་ཁང་ཕྲ་མོར། །ལྟད་མོ་ལྟ་དབང་ལོས་ཡོད། །༡༠༩གྲུ་ཤིང་རྟ་མགོ་ཀེར་ཀེར། །རྟ་མགོའི་དར་ལྕོག་ལྷེབ་ལྷེབ། །ཐུགས་སེམས་སྐྱོ་སྐྱོ་མ་མཛད། །བྱམས་པ་ལས་ཀྱིས་བཀོད་ཡོང་། །༡༡༠ཤར་རིའི་ལོགས་ནས་ཡོང་དུས། །ཤྭ་བ་ཡིན་པ་བསམ་ཀྱང་། །ནུབ་རིའི་ལོགས་ནས་སླེབས་དུས། །རྒོ་བ་རྐང་ཆག་ཡིན་པ། །༡༡༡ཆུ་མོ་ཡུར་པོ་གང་ཡོད། །རྫིང་བུ་གཅིག་ཏུ་སྐྱིལ་ཡོད། །བློ་བག་གྲོད་པར་ཡོད་ན། །རྫིང་བུ་འདྲེན་པར་ཕེབས་ཤིག །
47-6-44
༡༡༢ཁྲི་གདུགས་གླིང་བཞི་བསྐོར་བ། །ཉི་མ་རི་ལ་འཁོར་གིས། །ང་ལ་དགོས་པའི་བྱམས་པ། །རི་ལ་འཁོར་དུས་མི་འདུག །༡༡༣ཕ་རིའི་ལྷ་བྱ་གོང་མོ། །ཚུར་རིའི་བྱེའུ་འཇོལ་མོ། །སྐུ་ཚེ་ལས་འཕྲོ་ཟད་པའི། །གྱ་མ་དོ་གཅིག་བྱས་བྱུང་། །༡༡༤མདོ་བ་རྟ་ཕོ་བཞིན་གྱི། །མུ་ཁྲིད་གནང་ལ་མི་དགོས། །གཡང་དཀར་ལུ་གི་བཞིན་གྱིས། །རྒྱང་འཚོས་གནང་རོགས་གནང་ཞུ། །༡༡༥ཞིམ་པོ་རྒྱ་ཇའི་ཁུ་བ། །གང་གིས་སྤག་གིས་ཞིམ་པ། །ང་རས་བལྟས་པའི་བྱམས་པ། །གང་ནས་བལྟས་ཀྱང་མཛེས་པ། །
47-6-45
༡༡༦ཉིན་མོ་ཁ་དོག་མཚར་ལ། །མཚན་མོ་དྲི་ཁ་ཞིམ་པ། །ཀླུ་སྡིང་ནང་གི་མེ་ཏོག །གཏན་གྲོགས་དེ་ལས་དགའ་བ། །༡༡༧མཆོག་དཀར་གཞུ་མོའི་གཡབ་གཡུག །སུ་ལ་གནང་རྒྱུ་ཡིན་པ། །བྱམས་པ་སྟག་དོང་ཕྲ་མོའི། །དོངས་པའི་ནང་དུ་བཞག་ཡོད། །༡༡༨གནམ་ལ་སྤྲིན་པ་མི་འདུག །ས་ལ་བུ་ཡུག་འཚུབ་གིས། །དོག་པ་དེ་ན་མི་འདུག །གཞན་ལ་ཐུགས་ལྕག་གནང་ཞུ། །༡༡༩ཆུ་མོ་མར་འགྲོ་ཤར་ཤར། །ཀོང་ཡུལ་མཐིལ་ལ་སིམ་སོང་། །བྱ་དེ་རྒྱལ་སྨན་ཀ་ར། །ཐུགས་སེམས་སྐྱོ་སྐྱོ་མ་མཛད། །
47-6-46
༡༢༠མཆུ་མོ་འཁྲུག་ཀྱང་འཁྲུག་ཤོག །ཉ་མོ་འཕར་ཀྱང་འཕར་ཤོག །མཚོ་སྨན་རྒྱལ་མོ་མི་འཇོག །ཟླ་གྲོགས་སྤུན་གྲོགས་བཏང་གཏོང་། །༡༢༡ཀུ་མུད་དཀར་པོའི་རྒྱང་བཀྲག །འཛམ་གླིང་སྤྱི་ལ་ཤར་བྱུང་། །པད་མ་གེ་སར་སྡོང་པོ། །འབྲས་བུ་ཟུར་དུ་རྒྱས་སྐབས། །བྱ་ང་ཨ་བོ་ནེ་ཙོ། །སྐྱོད་རོགས་བྱེད་པར་སླེབས་ཡོང་། །༡༢༢ཕར་ཚུར་བརྩེ་དུང་མེད་པའི། །སྙིང་སྡུག་མ་བཞེངས་ལྷ་སྐུ། །འགྲོས་དང་གོམ་པ་མེད་པའི། །རྟ་མཆོག་ཉོས་པ་འདྲ་བྱུང་། །༡༢༣བླ་མ་དམ་པའི་གདམས་ངག །ཞུས་ན་གནང་གི་འདུག་སྟེ། །
47-6-47
ཨ་ལྕེ་ཆུང་འདྲིས་བྱམས་པར། །སྙིང་གཏམ་བཤད་དུས་མི་འདུག །༡༢༤སྟར་ཁ་ཡིན་ན་བཅག་ཆོག །ཁམ་བུ་ཡིན་ན་མུར་ཆོག །ད་ལོའི་ཀུ་ཤུ་སྔོ་རྡོག །སོ་ལ་རྩེབ་པོ་བྱས་བྱུང་། །


目录
༸རྒྱལ་དབང་ཚངས་དབྱངས་རྒྱ་མཚོའི་མགུར་གླུ་བཞུགས་སོ།།